EPISODE 2

(తేజ గట్టిగా అరుస్తాడు...)

ఆ మ్యాచ్‌లో ధోనీ చివరి వరకు క్రీజులో ఉండి బ్యాటింగ్ చేస్తాడు. ధోనీ ఆడుతున్నంతసేపూ జనార్దన్, తేజల అరుపులతో స్టేడియం దద్దరిల్లిపోతుంది. ధోనీ ఎంత అద్భుతంగా ఆడినా సరే, ఢిల్లీ చేతిలో చెన్నై జట్టు ఓడిపోతుంది.

మ్యాచ్ ఓడిపోయినందుకు తేజ బాగా నిరాశపడతాడు. కానీ జనార్దన్ ముఖంలో మాత్రం చిరునవ్వు ఉంటుంది. అది చూసిన తేజ, "ఏంట్రా... మ్యాచ్ ఓడిపోయాం కదా, నువ్వెందుకురా అలా నవ్వుతున్నావ్?" అని అడుగుతాడు.

దానికి జనార్దన్, "చాలా రోజులైందిరా... మనసారా ఇలా నవ్వి, ఇంత హ్యాపీగా ఉండి..." అంటూ తన ఫోన్ తీస్తాడు. ఫోన్ చూడగానే అతనికి వాళ్ళ చిన్నప్పటి ఫ్రెండ్ ప్రసాద్ పెట్టిన వాట్సాప్ స్టేటస్ కనిపిస్తుంది. అందులో ఓ రొమాంటిక్ తమిళ పాటను పెట్టి, "ఫరెవర్ మై లవ్ (Forever my love)" అని క్యాప్షన్ రాసి ఉంటుంది. అది చూడగానే జనార్దన్ వెంటనే ప్రసాద్‌కి కాల్ చేస్తాడు.

"హలో? ఏంట్రా ప్రసాదూ... ఏంటి మ్యాటరు? ఆ పాటా, ఆ క్యాప్షనూ చూస్తుంటే ఏదో పెద్ద విషయమే ఉన్నట్టుంది?" అని ఆటపట్టిస్తూ అడుగుతాడు.

అప్పుడు ప్రసాద్ కాస్త సిగ్గుపడుతూ... "అంటే అది... మావా... బయట ఎవరికీ పెద్దగా చెప్పలేదురా, మన క్లోజ్ ఫ్రెండ్స్‌కి మాత్రమే తెలుసు. ఈమధ్యే అనూష అని ఒక అమ్మాయి పరిచయమైంది. తన్ని ప్రేమిస్తున్నాను," అని చెప్తాడు.

అది విన్న జనార్దన్ నవ్వుతూ, "అబ్బో! పెద్ద లవ్వే... కానీ ఆ తమిళ పాటలు పెట్టి మమ్మల్ని చావగొట్టకు నాయనా, అవి నేను వినలేకపోతున్నాను," అంటాడు.

ఆ మాటకి ప్రసాద్ కూడా నవ్వి, "సరేలేరా... అయినా అవి నాకు నచ్చి కాదు, తనకి ఆ పాటలంటే ఇష్టం," అని కవర్ చేసుకుంటూనే మాట మారుస్తాడు. "అవును, అసలు నీతో మాట్లాడకూడదని అనుకున్నాన్రా నేను. మొన్న న్యూ ఇయర్‌కి నువ్వు శ్రీనివాస్, వెంకట్‌లను కలిశావు అంట కదా? అక్కడి దాకా వచ్చి నాకు కనీసం ఒక్క మాట కూడా చెప్పకుండా వెళ్ళిపోయావా?" అని నిలదీస్తాడు.

ఆ ప్రశ్న వినగానే జనార్దన్‌కు ఏం చెప్పాలో, ఎలా కవర్ చేసుకోవాలో అర్థం కాదు. నీళ్లు నములుతూ... "అదే... సరేరా, నెక్స్ట్ టైమ్ అక్కడికి వస్తే ఫస్ట్ నిన్నే కలుస్తా, సరేనా? సారీ రా, ఆరోజు అస్సలు కుదరలేదు, ప్రామిస్!" అంటాడు.

అప్పుడు ప్రసాద్, "ఒరేయ్! నిన్ను చిన్నప్పటి నుంచి చూస్తున్నాన్రా. నువ్వు నిజం చెప్తున్నావో, అబద్ధం చెప్తున్నావో నేను కనిపెట్టలేనా?" అని అంటాడు.

దొరికిపోయానని అర్థమైన జనార్దన్ వెంటనే, "హలో? హలో? మావా, సిగ్నల్ లేదురా, వాయిస్ కట్ అవుతోంది... నేను మళ్లీ చేస్తా," అని అబద్ధం చెప్పి కాల్ కట్ చేస్తాడు.

అదంతా గమనిస్తున్న తేజ, "ఎవడ్రా వాడు? నువ్వు ఎవరితోనూ ఇంతసేపు మాట్లాడటం నేను ఎప్పుడూ చూడలేదు!" అని ఆశ్చర్యంగా అడుగుతాడు.

దానికి జనార్దన్ తేలిగ్గా తీసుకుంటూ, "నువ్వు అనుకుంటున్నట్టుగా ఏమీ లేదులే, నా చిన్నప్పటి ఫ్రెండ్ గాడు. అనవసరంగా వాడికి ఫోన్ చేసినట్టున్నాను, నా బుర్ర మొత్తం తినేశాడు," అంటాడు.

కానీ, అలా ఒక చిన్న అబద్ధం చెప్పి జనార్దన్ తనకు తెలియకుండానే ఎంత పెద్ద తప్పు చేశాడో అతనికి అప్పుడు అర్థం కాలేదు! పాపం... రాబోయే భవిష్యత్తు అతనికి ఎలాంటి పరీక్ష పెట్టబోతోందో!