EPISODE 13

మరోవైపు నాని రాలేదనే కోపంతో రగిలిపోతోంది జయ. విసురుగా ఇంట్లోకి వచ్చిన జయను చూసి వాళ్ల అమ్మ, "ఏంటే, అప్పుడే వచ్చేయమంటే అంత త్వరగా వచ్చేశావ్!" అని అడిగింది.

జయ చిరాకుగా, "ఏంటి, ఇప్పుడు రాకూడదా?" అంటూ గిరుక్కున వెనక్కి తిరిగి తన గదిలోకి వెళ్లిపోయింది.

"ఇప్పుడేమన్నానని అలా కసురుకుంటోందిరా మీ చెల్లి?" అని అక్కడే ఉన్న జయ వాళ్ల అన్నయ్యను అడిగింది వాళ్ల అమ్మ.

"అదంతేనమ్మా, పిచ్చిది. నువ్వు వదిలేయ్," అని లైట్ తీసుకున్నాడు వాళ్ల అన్నయ్య.

జయ తన గదిలోకి వెళ్లి కోపంగా మంచం మీద కూర్చోగానే, నాని దగ్గరి నుంచి ఫోన్ కాల్ వచ్చింది. అది చూడగానే ఆమె కోపం కట్టలు తెంచుకుంది.

కాల్ లిఫ్ట్ చేయగానే, "ఏంటి నానీ? అసలేమనుకుంటున్నావు నువ్వు? నీకోసం థియేటర్ దగ్గర ఎంతసేపు వెయిట్ చేశానో తెలుసా? అమ్మను బతిమాలుకుని బయటకొచ్చాను, వైష్ణవిని కూడా తీసుకొచ్చాను. అంతా సెట్ అయ్యిందనుకుంటే, నువ్వే రాలేదేంటి?" అని నానికి కనీసం ఊపిరి పీల్చుకునే అవకాశం కూడా ఇవ్వకుండా ఏకధాటిగా నిలదీసింది.

అప్పుడు నాని నెమ్మదిగా, "అలా కాదు యువరాణీ, కాస్త కూల్ అవ్వు. మా పిన్నికి హెల్త్ బాగోలేదు, అందుకే అర్జెంట్‌గా చూడటానికి వచ్చాను. ఇక్కడ అసలు సిగ్నల్స్ లేవు, నీకు కనీసం ఫోన్ చేసి చెప్దామన్నా కుదరలేదు..." అని వివరణ ఇచ్చే ప్రయత్నం చేశాడు.

"అయినా సరే, నువ్వు రావాలనే కదా నేను ఆశపడింది! నువ్వు వస్తావని ఎంతగా ఎదురుచూశానో తెలుసా?" అని నిరాశగా అంది జయ.

నాని గొంతు బరువెక్కింది. "జయా… మా అమ్మ నాన్న నన్ను పుట్టినప్పుడే వదిలేశారు. అప్పటినుంచి మా అమ్మమ్మ నన్ను ఎంత ప్రేమగా చూసుకుందో, మా పిన్ని కూడా అంతే ప్రాణంగా చూసుకుంది. నా జీవితంలో ఆవిడ తర్వాతే ఎవరైనా సరే…" అని కరాఖండిగా చెప్పాడు.

అది విన్న జయకి, నాని తనని అస్సలు కేర్ చేయడం లేదన్న భావన కలిగింది. "సరే, నువ్వు రాలేదు కదా! ఇంక నాతో మాట్లాడకు పో! నేను కూడా నీతో ఇక ఎప్పటికీ మాట్లాడను. నా టైమ్ అంతా వేస్ట్," అని అలకగా అంది.

అప్పుడు నాని, ఎలాగోలా జయను కూల్ చేయడానికి టాపిక్ మార్చి సరదాగా... "ఇదిగో అమ్మాయ్, అసలు నువ్వెవరో నాకు తెలీదు. నా పేరు జనార్దన్. ఇంతకీ నీ పేరేంటి?" అని అడిగాడు.

దానికి జయ, "నన్ను కూల్ చేద్దామని ట్రై చేయకు. ఐ యామ్ హర్ట్... బుంగమూతి పెట్టుకున్నాను… ఉహుః ఉహు…" అని ముద్దుగా కోప్పడింది.

"సరే, నెక్స్ట్ సండే కలుద్దామనుకున్నాను… మరింకేం, నీ ఇష్టం," అని ఆటపట్టించాడు నాని.

ఆ మాట వినగానే జయ ముఖంలో చిన్న నవ్వు వెలిసింది. "నానీ… నిజానికి ఐ యామ్ సారీ. కోపంలో అలా అనేశాను. ఇప్పుడు మీ పిన్ని గారికి ఎలా ఉంది?" అని ఆప్యాయంగా అడిగింది.

"ఇప్పుడు పర్లేదులే. నెక్స్ట్ సండే కలుద్దాం, సరేనా!" అన్నాడు నాని.

"ఇదిగో, వస్తానని మాట ఇచ్చావ్… ఆరోజు కనుక రాలేదో నాలో ఇంకో యాంగిల్ చూస్తావు. నేను నిన్ను ఏమన్నా సరే, అదంతా నిన్ను చూడటానికే పడుతున్న పాట్లు అని గుర్తుంచుకో," అని వార్నింగ్ ఇస్తూనే తన మనసులోని మాట బయటపెట్టింది.

దానికి నాని కావాలనే, "అవునూ… ఇంతకీ ఎందుకంత పట్టుబట్టి నన్ను కలవాలి, చూడాలి అంటున్నావ్? ఏంటి మ్యాటర్?" అని సూటిగా అడిగాడు.

ఆ ప్రశ్నతో జయకి ఏం చెప్పాలో అర్థం కాలేదు. 'అవును… నాకెందుకు అలా అనిపిస్తోంది?' అని తనను తానే ప్రశ్నించుకుంది.

కవర్ చేసుకుంటూ, "నానీ… జస్ట్ మనం ఫ్రెండ్స్ కాబట్టి, ఆ చొరవతో అంటున్నాను. సరదాగా… అంతకన్నా ఇంకేం లేదు… ఊరికే," అని తడబడుతూ సమాధానమిచ్చింది.

"సరే సరే… సండే కలుద్దాంలే," అని నాని కాల్ కట్ చేశాడు.

జయ మాత్రం నాని అడిగిన ప్రశ్న గురించే తీవ్రంగా ఆలోచిస్తోంది. *'తనను వదిలేసిన వాళ్ల గురించి కాకుండా, తనను పెంచిన వాళ్ల కోసం... తన పిన్ని కోసం నాని ఇంతగా ఆలోచిస్తున్నాడంటే… హి ఈజ్ ఏ వైజ్ మ్యాన్ (He is a wise man),' * అని మనసులో నాని మీద మరింత గౌరవం పెంచుకుంది.